Spring menu over og gå til indholdVend tilbage til forsidenGå til vores guide for tilgængelighedNæste indlæg: Forrige indlæg:

7ly High Nuummeersut atallaarsualerlutik, nutsatik qassutaasalerlugit skuutillu tungujortunik poorlugit suliffeqarfimmik takornariarput

Suliffeqarfimmut ikorfartueqataasumut Royal Greenlandimut suliffeqarfimmik takornariarneq nukappiaqqat 7ly High-imeersut qangali qilanaarisimavaat. Umiarsuarmi tunitsivimmi aalisakkerivimmilu immikkut takornariartinneqarput.

7ly High fra Nuuk tog på virksomhedsbesøg iført heldragter, hårnet og blå futter

Nukappiaqqat arfinillit suliffeqarfeeqqamit 7ly High-imeersut ataasinngornerit tamaasa fritidsklubbimi Innerulaani naapittarput, naapinnerminni tujuulunnik nasartalinnik avatangiisinik mianerinnilluni sanaajusunik tuniniaasalernissaminnik pimoorussillutik suliaqartarput. Ataasinngornerli una missingersuusiorfiunanilu, attaveqaqatigiinnissamik pilersaarusiorfiunanilu tunisassanik ineriartortitsiffiunani pivoq, tassami suliffeqarfiup ikorfartueqataasup Royal Greenlandip allatulaaq suliaqalaarniassammata suliffeqarfimmut qaaqquai.

Seqernup aput tamangajaat aatsereeraluaraa talittarfik qiianakujuppoq. Nukappiaqqat 7ly High-imeersut, venturepilotitut suleqataasut suliffeqarfimmillu ikorfartueqataasut ilagalugit qilanaarlutik utaqqipput. Aalisariuterujussuaq taleqqammersoq talittarfimmiippoq.

Immikkut takornariartinneqarneq

Tamarmik umiarsuaaqqamut ikipput, umiarsuullu naalagaa skipperilu tikilluaqqusipput takornariartitsillutillu. Imarsiorluni sulineq sakkortusinnaasoq pillugu nukappiaqqat paasisaqarput, paasissutissarpassuarnillu pissanganartunik pissarsillutik. Takornariarnerminnilu umiarsuup naalagaanut skipperimullu aperinissaminnut periarfissaqarput, taakkulu nukappissanut oqaluttuarluartupilussuupput. Claus Nielsen, Royal Greenlandimi ineriartortitsinermut siunnersortaasoq peqataavoq. Nukappiaqqat taama periarfissinneqarnerat taassuma nuannaarutigaa, Royal Greenlandimilu sulisunut aamma pissarsissutaavoq.

”Suleqatitsinnut isumalerujussuuvoq inuusuttunut sakkortuumik atugalinnut taamatut tunniussaqarneq. Ataaseq, marluk imaluunniit pingasut ingerlariaqqippata ajunngissaqaaq,” Claus oqarpoq.

 

Aalisariummi takornariartinneqareeramik aalisakkerivimmut ingerlaqqipput, tassanilu atisassat pisariallit atineqarput; atallaat, nutsanut qassutaasat skuullu puui tungujortut. Ulluinnarni aalisakkerivimmut isersinnaasut killilersorneqartaraluarput, sulinerulli kingorna eqqiaasoqannginneranilu suliffeqarfeeqqameersut alakkaatinneqarput.

Aalisakkerivimmi aalisakkat tuniniaqqitassat suliarineqartarput qerititsiverujussuarnullu inissinneqartarlutik. Aalisagarpassuit qerisut pisiniarfinni kingornatigut takuneqarsinnaalersussat qerititsivimmiipput.

Suliffeqarfimmit ikorfatueqataasup  Agathep maluginiarpaa nukappiaqqat nutaanik pissanganartunillu misigisaqartut.

”Meeqqat taamatut allatut misigisaqaqatigilaarlugit nuannerpoq. Taavalu, nuannerluni tupigusukkaangamik paasisaqarpasillutik. Uanga taanna nuannernerpaatippara.” Agathe oqaluttuarpoq.

Suliffeqarfimmit ikorfartueqataasup saqqummiinera

Royal Greenland suliffeqarfiuvoq nutaaliaasorujussuaq, tassanilu pitsaassutsimut nerisassallu isumannaatsuunissaannut piumasaqaatit annertupput. Nunarsuarmilu aalisakkanik qalerualinnillu pilersuisut annersaasa ilagaat. Tamakku allarpassuillu pillugit 7ly High-imeersut paasisaqarput suliffeqarfimmit ikorfartueqataasoq suliffeqarfik pillugu isumassarsinartumik saqqummiimmat, saqqummiineranilu juiceeqqat, naatitat, kaffi tiilu sassaalliutigineqarput angerlaassassaminnillu poortugannguanik pinnapput.

”Uanga umiartunngorniarnissannut paasissutissanik pivunga. Pilerinarsinerulerpoq umiartunngornissaq. Aquttunngornissamut piumassusiginnarluni.” Taama ulloq pissanganartoq isumassarsinartorlu naggaserlugu Anguteeraq 7ly High-imeersoq oqarpoq.

Sulisartutut inuunermut aqqutissiuivoq

Mind Your Own Business-imi programmimut atatillugu suliffeqarfeeqqat nunatsinni inuussutissarsiortunut, suliffeqarfiit Mind Your Own Business suleqatigalugu suliffeqarfittut ikorfartueqataasutut peqataarusussimasunut qaaqquneqartarput.

Suliffeqarfiit ikorfartueqataasut tamarmik assigeequtigaat tamarmik nukappiaqqanut Mind Your Own Business-imiittunut sunniuteqaqataarusussuseqarnertik, nukappiaqqallu suliffeqarfeeraasa ineriartortinnissaannut suleqataarusussuseqarnertik kiisalu nukappiaqqat paasitinnissaannut suliffeqarfeqartoq nukappiaqqanik taakkuninnga sulisoqarusuttunik.

” Mind Your Own Business-imi suliffeqarfittut ikorfartueqataasutut inissikkusussimavugut inuusuttunut allanngueqataasinnaasumik suliniummut peqataarusukkatta. Nunatsinni suliffeqarfiit annersaattut misigisimavugut suliniaqatigiiffiit inuiaqatigiinni pingaarutillit tapersersussallugit pisussaaffeqarluta – Mind Your Own Business-ilu inuiaqatigiinni pingaarutilimmik suliaqarpoq.”, taama oqarpoq Sara Biilmann Egede, Royal Greenlandimi HR-imi ineriartortitsinermut aqutsisoq.

Royal Greenlandimik suleqateqarnerput nuannaarutigisorujussuuarput, suliamut tunngatillugu ilisimasaqarluarlutik tunniusimalluarlutillu nukappiaqqat sulinerat tapersersormassuk.

Suliffeqarfeeqqami 7ly High-imiittut suliffeqarfeeqqaminnik ineriartortitsinerminni ingerlalluarnissaannik kissaappavut.